మ.. మ.. మార్స్‌ అంగారకుడు

మ.. మ.. మార్స్‌
అంగారకుడు

ఫ్రెండ్స్‌! నేనే చిన్నూని. మా నాన్న పేద్ద సైంటిస్టు. ఎప్పుడూ గ్రహాల గురించే కబుర్లు చెప్పేస్తుంటాడు. అవి వింటూ నిద్ర పోతానా. ఒకటే కలలు. నేను వేరే గ్రహం మీదకెళ్లినట్లు... గ్రహాంతర వాసులతో మాట్లాడినట్టూ.. కలలొచ్చేస్తాయ్‌.  నిజ్జంగా అలా చేయాలని నా కోరిక. ఇప్పుడేమో మా నాన్న ఓ స్పేస్‌ షటిల్‌ని తయారు చేశారు. దాని పేరేమో పుష్పక్‌. దాంట్లోకి ఎక్కితే జామ్మంటూ ఏ గ్రహం మీదకైనా వెళ్లిపోవచ్చని ఆయన ఎవరితోనో చెబుతుంటే విన్నా. ఇప్పుడు దాని తాళాలు నాకు దొరికాయి. మెల్లగా తలుపు తీశానా. టామీ నా వెనకాలే పరిగెత్తుకొచ్చింది. ఇద్దరం లోపలికి వెళ్లగానే ఢమాల్‌మంటూ శబ్దం. తలుపులు మూసుకుపోయాయి. పక్కనే ఏదో మీట కనబడింది. తలుపులు తెరుచుకుంటాయేమోనని దాన్ని నొక్కా. అది రయ్యిమంటూ ఆకాశంలోకి పరిగెట్టింది. ఇలా గాల్లోకి దూసుకుపోతుంటే భలే సరదాగా ఉంది. ఇక్కడేవో స్పేస్‌సూట్లు, హెడ్‌సెట్లు ఉన్నాయ్‌. ఎందుకైనా మంచిది టామీ నేనూ ఇవి వేసుకుంటాం.
హ్మ్‌.... అరె టామీ ఇదేదో వింత లోకంలా ఉంది. ఇది ఇక్కడికొచ్చి ఆగిందేంటి. బయటేముందో అద్దంలోంచే చూద్దాముండు. ఏదో వింత ఆకారం ఇటువైపే వచ్చేస్తోంది. అరే పుష్పక్‌లోకెక్కేస్తోంది. వామ్మో!
చిన్ను: ఏయ్‌! ఎవర్నువ్వు? అసలు మేం ఎక్కడున్నాం?
స్పేసీ: నన్ను స్పేసీ అంటార్లే. నేనెవరో తర్వాత చెప్తాగానీ ఇది అంగారక గ్రహం!
చిన్ను: అవునా? నీకేమో మూడు కాళ్లు, మూడు కళ్లు... ఉన్నాయ్‌. నీలాంటి వాళ్లని నేనెప్పుడూ చూడ్లేదు.
స్పేసీ: ఎలా చూస్తావ్‌. నాలాంటోళ్లు మీ భూమ్మీదేం ఉండరుగా.
చిన్ను: ఔను. మరి మేము అక్కడి నుంచే వచ్చామని నీకెలా తెల్సు?
స్పేసీ: హ్హహ్హహ్హ! తెలుసులే. నేను ఏ గ్రహంపైకైనా వెళ్లగలను. సరదాగా గ్రహాలన్నింటికీ వెళుతూ వస్తూ ఉంటా.
చిన్ను: అ...వు...నా భలే భలే! గ్రహాలన్నీ చూడటమంటే నీలా నాకూ ఇష్టమే. చూపిస్తావా?
స్పేసీ: ఓ.. తప్పకుండా. అవన్నీ నాకు కొట్టిన పిండే!
చిన్ను: అంగారక గ్రహమంటే మా భూమికి చాలా దగ్గర్లో ఉంటుంది కదూ!
స్పేసీ: అవునవును. అందుకేగా రోవర్లనీ క్యూరియాసిటీలనీ ఏవేవో ఇక్కడికి పంపేస్తున్నారు.
చిన్ను: ఇక్కడి విషయాలన్నీ తెలుసుకుందామనేలే మా వాళ్ల తాపత్రయం. చూస్తుంటే ఇదంతా ఎర్రగా ఉందేం?
స్పేసీ: హుమ్‌! ఈ గ్రహంలో ఇనుప ఖనిజం  నిక్షేపాలు చాలా ఎక్కువ. అందుకే చూడ్డానికి ఎర్రగా ఉంటుంది. అందుకే దీన్ని రెడ్‌ ప్లానెట్‌ అనేస్తారంతా.
చిన్ను: ఇక్కడ కొండలూ, వాగులూవంకలూ ఉంటాయా?
స్పేసీ: ఉండేవన్నీ గడ్డకట్టే ఉంటాయి. ఎందుకంటే ఇక్కడ సరాసరి ఉష్ణోగ్రత -55 డిగ్రీలు మరి. ఇక అంతరిక్షంలో అన్ని గ్రహాల్లో ఎత్తయిన అగ్ని పర్వతం ఉన్నదిక్కడే. దాని పేరు ఒలంపస్‌ మాన్స్‌. అది దాదాపుగా 27కిలోమీటర్ల ఎత్తుంటుంది. మీ ఎవరెస్టుల్లాంటివి మూడు ఒకదానిపై ఒకటి ఉంటే అంతకంటే ఇదే ఎత్తుమరి. ఇంకా ఇది 600కిలోమీటర్లు విస్తరించింది. ఇక విశ్వంలో అతి లోతైన లోయా ఇక్కడే ఉంది. అందులో మీ అమెరికాయే పట్టేస్తుంది. అంత పెద్దది.
చిన్ను: అయ్యబాబోయ్‌! ఇదేంటీ. టామీ గెంతితే అంత సేపటికి గాని కింద పడట్లేదు. కుదురుగా ఉండు టామీ.
స్పేసీ: మీ భూమితో పోలిస్తే ఇక్కడ గురుత్వాకర్షణ శక్తి 62శాతం తక్కువ. అందుకే టామీ అంతసేపు గాల్లో ఉంటోంది. నువ్వు భూమ్మీద 45 కేజీలున్నావనుకో ఇక్కడ దాదాపుగా 17 కేజీలుంటావంతే.
చిన్ను: నిజమా! ఈ స్పేస్‌సూట్‌లో ఏదోలా ఉంది. ఓసారి బయటకెళ్లొచ్చా.
స్పేసీ: వద్దొద్దు. సూట్‌ తీసెస్తే నీకిక్కడ ఊపిరాడదు. ఎందుకంటే ఇక్కడ గాల్లో 95శాతం కార్బన్‌ డయాక్సైడే. మూడు శాతం నైట్రోజన్‌, మిగిలిన కొద్దిలో నీటి ఆవిరి, ఆక్సిజన్‌ ఇతర వాయువులూ ఉంటాయి. ఇక్కడ నాకు తెలిసినంత వరకూ జీవులేం లేవు. నా సంగతి వేరనుకో.
చిన్ను: సూర్యుడి దగ్గర నుంచి మూడో గ్రహం మా భూమి, అయితే నాలుగో గ్రహం ఇదే కదా. గ్రహాల్లో రెండో అతి చిన్నదనీ నాకు మా నాన్న చెప్పారు.
స్పేసీ: తెలివైనవాడివేనోయ్‌. ఇక్కడ ఏడాదంటే 687 రోజులు. ఎందుకంటే ఇది మీ గ్రహం కంటే పదింతలు చిన్నది కదా. అందుకే సూర్యుడి చుట్టూ ఒక్కసారి తిరిగి రావడానికి ఇంత సమయం.  అదే ఇక్కడ ఒక్కరోజంటే 24 గంటల 37 నిమిషాలు.
చిన్ను: అలాగా! చీకటి పడుతున్నట్లుంది మరి. రెండు చందమామలు కనబడుతున్నాయేంటి?
స్పేసీ: అవును మీకు చందమామ ఒకటే. దీనికిలాంటివి రెండున్నాయి.
చిన్ను: ఇదేంటో దుమ్ము ఎక్కువ ఎగిరొచ్చేస్తోంది.
స్పేసీ: ఇదా! ఇక్కడ నెలల తరబడి దుమ్ము తుపానులు ఇలా వస్తూనే ఉంటాయ్‌. గాలులు ఎక్కువ. నేలంతా దుమ్ము, రాళ్లే. అందుకని అదిలా ఎగిరి వచ్చేస్తుంటుంది. మీరు ఇందులోనే నిద్రపోండి. పొద్దున్నే నా స్పేస్‌జట్‌లో మీ భూమికి అటువైపు ఉన్న వీనస్‌కి బయలుదేరేద్దాం.
చిన్ను: చాలా థాంక్యూ స్పేసీ! నిన్ను చూస్తుంటే నాకు చాలా ధైర్యంగా ఉంది. వేరే గ్రహం వాళ్లమైతే ఏం చెయ్యకుండా మాతో చాలా ఫ్రెండ్లీగా ఉన్నావు. బై.

* మన భూమికి అంగారకుడికి మధ్య దూరం 54.6 మిలియన్‌ కిలోమీటర్లు * అంగారకుడికి సూర్యుడికి మధ్య దూరం 227.9 మిలియన్‌ కిలో మీటర్లు